बहुचर्चित हेटौडा काठमाण्डौं सुरुङ मार्गको निर्माणकार्य वर्षायाम सकिएलगत्तै शुरु हुने

हेटौँडा । नेपाल पूर्वाधार कम्पनीका अध्यक्ष कुशकुमार जोशीले बहुचर्चित हेटौँडा–काठमाडौँ सुरुङ्ग मार्गको निर्माणको महत्वपूर्ण काम बर्षायाम पश्चात शुरु हुने बताउनुभएको छ । प्राबिधिक र प्रशासनिक कारण निर्माणमा एक बर्ष ढिलाई भएको भन्दै निर्माणको मुख्य काम शुरु भएपछि निर्माण कार्य द्रुत गतिमा अघि बढ्ने समेत बताउनुभयो । सुरुङ्ग मार्गको कुल लागतको ८० प्रतिशत रकम ऋण लिने तयारीमा रहेको र चाँडै बिदेशी लगानीकर्ताको टोली स्थलगत भ्रमणका लागि मकवानपुर आउने उहाँले जानकारी दिनुभयो । सडक मार्गका लागि जग्गा अधिग्रहण प्रकृया शुरु भएको र जग्गा पाउने वित्तिकै काम शुरु हुने उहाँले बताउनुभयो । सडक मार्गको कुल लगानी ३५ अर्ब मध्ये २८ अर्ब ऋण सम्झौता भएको तीन महिनाभित्र ऋण प्राप्त हुने बताईएको छ । अपुग सात अर्बको जोगाडमा कम्पनी लागेको भन्दै तीन अर्ब रकम संकलन भईसकेको अध्यक्ष जोशीले जानकारी दिनुभयो । जसमध्ये जापानको टीबीआई होल्डिङ्स कम्पनी लिमिडेले एक अर्ब रुपैँयाको शेयर खरिद गरेको कम्पनीले जनाएको छ । कम्पनीको काम कारबाही पारदर्शी रहेको दाबी गर्दै उहाँले लगानीकर्तालाई दिग्भ्रमित पार्ने काम नगर्न सम्वन्धित सबै पक्षलाई आग्रहपनि गर्नुभयो । सुरुङ मार्गको नाममा ठगी गरेको भन्ने आरोप प्रकृयागत रुपमा आए जवाफ दिन आफुहरु तयार रहेको जिकिर गर्दै उहाँले चित्त नबुझे उजुरी गर्न पनि अनुरोध गर्नुभयो । सुरुङ मार्ग निर्माण पछि सबैभन्दा बढी मकवानपुर जिल्ला लाभान्वित हुने भएकोले यहाका सरोकारवाला बढी जुर्मुराउनु पर्ने उहाँको धारणा थियो । चार लेनको सडक र तीन वडा टनेल रहने हेटौँडा–कुलेखानी–काठमाडौँ सडकको लम्बाई ५८ किलोमिटर रहेने छ । चार बर्षभित्र निर्माण सक्ने लक्ष्य राखिएको सुरुङ्ग मार्ग सञ्चालनमा आएपछि एक घण्टामा नै हेटौँडा–काठमाडौँ आवत जावत गर्न सकिने कम्पनीको दाबी छ । सुरुङ मार्ग प्रयोग गरेबापत सवारी साधनबाट शुल्क उठाउन सरकारबाट अनुमती पाउने कम्पनी पहिलो हो ।