नेइमारले भने- मेरो विश्वकप अन्त्य भएको छैन (भिडियो सन्देश)

रियो द जेनेरियो– विश्वकप गुमाएका ब्राजिलका स्टार स्ट्राइकर नइमारले शुभेच्छुकलाई भावुक सन्देश दिएका छन्। विश्वकपमा जादुयी प्रदर्शन गरेर ४ गोल गरेका २२ वर्षे स्ट्राइएकले भिडियो सन्देशमार्फत् आफू टोलीमा नरहे पनि सहकर्मीहरुले विश्वकप उपाधि जित्ने विश्वास व्यक्त गरेका छन्। नेइमारको सन्देशको पूर्ण पाठ 'ब्राजिलका जनता, प्रशिक्षक र फ्यान! यो निकै गाह्रो अवस्था हो। मलाई मेरो भावना शब्दमा व्यक्त गर्न निकै गाह्रो भइरहेको छ। म तपाइँहरुलाई भन्न चाहन्छु कि म सकेसम्म चाँडै मैदानमा फर्किनेछु। सहयोग र शुभच्छाका सन्देश पठाउने तपाइँहरुलाई धन्यवाद दिन चाहन्छु। मेरो विश्वकप अन्त्य भएको छैन, यो अवद्ध भएको हो। प्रतियोगिता जारी छ र च्याम्पियन बन्ने मेरो सपना साकार पार्न सहकर्मीहरुले सबैथोक गर्नेछन्। मेरो सपना विश्वकप फाइनल खेल्ने थियो तर म विश्वस्त छु मेरा साथीहरु नै च्याम्पियन हुनेछन्। उनीहरु च्याम्पियन हुनेछन् र म उनीहरुसँगै त्यहाँ हुनेछु। तथा छिटै सबै ब्राजिलियनहरुले त्यो उल्लास मनाउनेछन्।' नेइमारकोको उपचारमा संलग्न चिकित्सकले उनको चोट धेरै लामो समयसम्म नरहने बताएका छन्। ढाडको दुखाइ हेरेर जर्मनीविरुद्धको सेमिफाइनल खेल हेर्न जानसक्ने सम्भावना रहेको उनीहरुले जानकारी दिए। 'नेइमार ४५ दिनपछि फिट हुनेछन्', चिकित्सक होसे लुइज रुकानोले भने। लुइस फिलिप स्कोलारीको ब्राजिल विश्वकपको सेमिफाइनलसम्म पुग्दा नेइमार मुख हतियार थिए। कोलम्बियासँग क्वाटरफाइनलमा घाइते भएका उनले सबै फ्यान र शुभेच्छुकलाई धन्यवाद दिएका छन्।