दशैंमा कसरी गाडी चलाउने

काठमाडाै‌, भदाै १६ - 

बाढी पहिरोका कारण देशका धेरैजसो ठाउँमा ग्रामिण क्षेत्र जोड्ने सडक भत्किएका छन् । निर्माण सामाग्री ठप्प हुँदा बिग्रिएका सडक मर्मत हुन सकेका छैनन् भने बनाउन लागिएका पुलहरु पनि त्यसै अलपत्र छन् ।

बाटोको अवस्था दयनीय भएकाले दशैंमा गाडी चलाउनै मुश्किल हुने यातायात व्यवसायीले बताएका छन् । बाढी पहिरोले पहाडी क्षेत्रका तेहथुम, भोजपुर, रामेछाप, रुकुम, संखुवासभा, ताप्लेजुङ लगायत जिल्लाका सडक ठाउँ ठाउँमा भत्किएका छन् । यात्रुको सहजताका लागि दशैंमा नयाँ गाडी थप गर्ने भनिएपनि बाटोको अवस्था सुधार नभए गाडी चलाउन नसकिने नेपाल यातायात व्यवसायी राष्ट्रिय महासंघका कोषाध्यक्ष सरोज सिटौलाले बताउनुभयो ।

दशैंका लागि आउँदो २५ गतेदेखि अग्रिम टिकट बुकिङ खुला गरिएको छ । तर ठाउँ ठाउँमा बाटो भत्किएका कारण यात्रा सहज नहुने हो कि भन्ने यात्रुलाई चिन्ता छ । यातायात व्यवसायीले बाटो तत्काल मर्मत गर्न सरकारको ध्यानाकर्षण समेत गराईसकेका छन् ।  सरकारले भने गाडी चल्न समस्या नपर्ने बताएको छ ।

भौतिक पूर्वाधार तथा यातायात व्यवस्था मन्त्रालयका सचिव तुलसी सिटौलाका अनुसार भत्किएका ठाउँमा वैकल्पिक बाटो प्रयोग गर्नुका साथै  डाईभर्सन पनि गरिनेछ । त्यसका लागि अहिले तीब्र गतिमा काम भैरहेको छ । दशैंका लागि पुल बनाउन सम्भव नभएपनि नदी खोलामा बेलिब्रिज राख्ने काम भैरहेको सचिव सिटौलाले बताउनुभयो । 

पूर्व पश्चिम राजमार्ग अन्तरगतको सडकखण्डमा ३ ठाउँमा बाटो बिग्रिएकोमा २ ठाउँमा डाईभर्सन गरिसकिएको र अर्को ठाउँमा बनाउने काम भैरहेको सचिव सिटौलाले जानकारी दिनुभयो ।