ड्यामसाइट हेरेर फर्किंदा चिप्लिएर लडे गृहमन्त्री

सिन्धुपाल्चोकको जुरेमा ड्यामसाइट निरीक्षण गर्न गएका उपप्रधान तथा गृहमन्त्री बामदेव गौतम लडेर घाइते हुनुभएको छ ।

मंगलबार दिउँसो ड्यामसाइट हेर्न गएका गौतम अप्ठेरो बाटो हुँदै फर्कने क्रममा चिप्लिएर लड्नुभएको हो ।

प्रहरीका अनुसार उहाँको घुँडामा सामान्य चोट लागेको छ । खाडीचौरमा उपचार गरेर उहाँ मंगलबार नै काठमाडौं फर्कनुभएको छ ।

गृहमन्त्री गौतम दिउँसो झण्डै ३ बजे सिन्धुपाल्चोकको जुरे पुग्नुभएको थियो । मोटरबाटो हुँदै त्यहाँ पुगेका गौतम अघिपछि प्रहरी र सरकारी अधिकारीलाई लिएर पैदल हिँड्नुभयो । जुरेमा पहिरोले थुनिएर ताल बनेको ठाउँ कस्तो भएछ भनेर उहाँलाई हेर्नु थियो ।

पहिरो गएको ठाउँमा हिँड्न यसै पनि अप्ठेरो हुने भयो । त्यसमाथि ड्यामसाइटसम्म पुग्ने पुरानो बाटो पनि मंगलबार बिहान भत्किएको थियो । ढुंगामुढा, हिलो चिप्लो पाखापखेरामा खाली खुट्टा हिँड्दा त लडिएला भन्ने डर । त्यसमाथि गृहमन्त्री छालाको जुत्ता लगाएर जानुभएका । जाँदा त उहाँ ठमठम हिँडेरै पुग्नुभयो ।