कञ्चनपुर, भदौ २४ –
नदी बढेको कारण देखाउँदै महाकाली यातायात बस व्यवसायी समितिको एक बस यात्रुहरुलाई बीचबाटैमा छाडेर फरार भएको छ ।
बुधबार बिहान ८ बजे महेन्द्रनगरदेखि बेलौरीका लागि छुटेको महाकालीको म१ख ५२९ नम्बरको बस यात्रुलाई छाडी फरार भएको हो ।
दैजी–बेल्डाँडी सडकखण्डमा पर्ने बाल्मा नदीमा पानीको बहाव बढेको कारण देखाउँदै उक्त बस यात्रुहरुलाई दैजीमा छाडी झलारी गएको पीडित यात्रुहरुले बताएका छन् ।
नदीमा पानीको बहाव बढेपछि केहीबेर रोकिएको उक्त गाडीले महेन्द्रनगरदेखि बेल्डाँडीसम्म टिकट काटेका यात्रु भरतबहादुर मल्ललगायतका यात्रुको टिकट फिर्ता नै नगरी गाडी झलारीतर्फ गएको बताइएको छ ।
“मैले महेन्द्रनगरदेखि बेल्डाँडीसम्मको दुई टिकट काटेको थिएँ, दैजीसम्मको टिकट काटेर बाँकी बचेको रकम फिर्ता गरेन,” मल्लले भने ।
बसपार्कदेखि सम्बन्धित ठाउँसम्म पु–याउने कर्तव्य भए पनि बस मालिकहरुले यसरी अनेक बहानामा यात्रुलाई धोका दिने गरेका छन् ।
यो बस सँगैको पवनदूतको गाडी उक्त नदीबाट पार भएर गयो, तर महाकालीका बसका यात्रुहरु मालिकले बहाना गरेपछि दैजीमा चार घण्टासम्म अलपत्र परेका थिए ।
दैजीमा अलपत्र परेका यात्रुहरु झन्डै पाँच घण्टापछि अर्को बसमा घर गए । यसबारे महाकाली यातायातका अध्यक्ष बाबुराम शर्माले बसले यात्रुको पैसा फिर्ता दिनुपर्ने बताएका छन् ।
No comments :
Post a Comment