प्राधिकरणले नयाँ मिटर दिने

मिटरको अभावमा विद्युत् सेवा पाउन नसकेका ग्राहकका लागि नेपाल विद्युत् प्राधिकरणले नयाँ मिटर दिने भएको छ। त्यसका लागि प्राधिकरणले चीनबाट ७३ हजार ४ सय ५० थान मिटर ल्याएको छ ।

प्राधिकरणका अनुसार मिटर केही दिन पहिले रक्सौल भन्सारमा आइपुगेको छ । केन्द्रीय भण्डार हेटाैँडामा आवश्यक परीक्षणपछि मिटर ग्राहकलाई बाँड्ने तयारी गरिएको छ । सेवाग्राहीहरूले विभिन्न कार्यालयमा मिटरको माग गर्दै विगत एक वर्ष पहिले निवेदन दिए पनि प्राधिकरणले आन्तरिक समस्याका कारण वितरण गर्न सकेको थिएन ।

प्राधिकरणसँग जगेडामा मिटर नभएका कारण नयाँ ग्राहकलाई प्रदान गर्न नसकेको र बिग्रेका मिटरसमेत साट्न सकेको थिएन । भदौ महिनाभित्रै पहिलो चरणमा निवेदन दिएका ग्राहकलाई मिटर प्रदान गरिने प्राधिकरणका निमित्त कार्यकारी निर्देशक रामचन्द्र पाण्डेले जानकारी दिनुभयो ।

प्राधिकरणले हाल ल्याएको मिटरमा सिङ्गल फेजका ६० हजार र थ्री फेजका १३ हजार ४५० मिटर रहेका छन् । नयाँ घर बनाउने तथा विभिन्न कारणले मिटर बिग्रेर मिटर कुरिरहेका ग्राहकले छिट्टै आउन लागेका दसैँअघि नै बिजुलीको मिटर पाउनेछन् ।